القائمة الرئيسية

الصفحات

آخر الأخبار

كيفية فرز الكتاكيت وايه هو الكتكوت الي تسكنه في مزرعتك وايه الي ترفضه وتفرزه وترجعه تاني للأقفاص



المقال دا عن اختيارك للكتكوت اية الكتكوت الي تسكنه في مزرعتك واية الكتكوت الي ترفضة وتفرزة وترجعة تاني للاقفاص وهو مقال طويل شوية

بلاش تسكن غير روص او كب او اي ار وفكك من الاربو كتكوت رخم وسلالة رخمة جدا ومقرفة وكلها لعب وتهجين غلط

👈 الوزن ميكنش في تفاوت كتير

حضرتك تجيب ١٠ كتاكيت وتوزنهم وتشوف متوسط الوزن كم وبعد كدا تحط اصغر كتكوت ع الميزانة وتشوف وزنه كم وتجيب اكبر كتكوت بردو وتشوف وزنه كم لو بين الاتنين اكتر من ٣ جرام ارفض الدفعة دي كدا دفعة مخلطة كبير علي صغير ومتخلطة في المعمل
الكتاكيت الكبيرة فيها ضعيفة الاستجابة للتعاملات الطبية وكثيرة الأمراض وبالاخص الامراض المتوارثة عن الام زاي السلمونيلا والميكوبلازما وجهاز المناعة عندها بيكون ضعيف
والكتاكيت الصغيرة سريعة الاستجابة
ودا طبعا له تأثير كبير جدا ع المناعة لانك هتضطر تعالج بإستمرار وعلي المصاريف
ثانيا هتلاقي الكتاكيت الكبيرة تحويلها سريع والكتاكيت الصغيرة تحويلها ابطيء من الكبيرة وهتلاقي تفاوت في الوزن وقدامك حل من اتنين اخر الدورة اما انك تبيع الفراخ الكبيرة وتسيب الصغيرة ودا غلط لان انا مش ضامن العربية الي جاية المزرعة فيها بلاوي اية ودي مشكلة كبيرة لان اكتر شيء بينشر الفيروسات هي عربيات الفراخ
والحل التاني انك تستنا لحد ما الكتكوت الصغير يكبر شوية وطبعا دي مصاريف تانية غاز وعمالة وكهرباء وماء بالإضافة إلي انك هتاكل علف بزيادة

👈 لما تدخل الاقفاص العنبر تدخل الاقفاص من الداخل وانت خارج وتحط كل قفص لوحده مش تحطهم علي بعض ودا طبعا لهدف هقولك عليه في المقال
👈 وزعنا الاقفاص ندخل بقا علي اهم جزء في الموضوع دا وهو الفرزة والفرزة دي بقا بتحدد خبرتك بجد
الكتاكيت فاقت من رصتهم فوق بعض في العربية وشعرت بالدفء وابتداء يكون في انتباه منهم هتنزل الكتاكيت علي الفرشة من القفص وتبص بعينك علي الكتاكيت واي كتكوت هتلاقيه مبروم او ملفوف فورا رجعة في القفص تاني
الكتكوت دا مهما تاكل فيه مش بيكبر ابدا تلاقيه نموه ضعيف جدا واغلبهم بيكون سردة او الكبير فيهم كيلو و٥٠٠ او كيلو و٦٠٠ وهيقرفك بجد

هتسيب الكتكوت صاحب المواصفات دي
ضهر عريض من عند الفخدين هتلاقي الضهر عريض
دا بقا حتي لو كتكوت ٣٥ جرام سبحان الله بياكل وبيحول حلو وبيكون وزنه ممتاز عكس اي كتكوت مبروم وملفوف ولية بقا ضهر عريض عشان الضهر لما بيكون عريض من عند الفخدين الصدر بتاع الكتكوت بيكون مفتوح مش مقفول تلاقي الصدر عامل زاي كفين الايد كدا لما تحطهم جنب بعض ومعظم وزن الفرخه في صدرها والفرخ المصدر حتي لو كيلو و٨٠٠ له زبون وبيتباع بسرعة اما المبروم الملفوف تلاقيه لو ٣ كيلو مقرف في البيع وبتبيعه اقل من البورصة اتنين جنية وتلاتة يبقا حضرتك من الاول تريح دماغك وأفرز كتاكيتك صح عشان ترتاح في اخر الدورة وتلاقي الكتاكيت ماشية معاك صح
معلش بقا المقال طويل 😂😂😂 ربنا ما يوريكم بعمل اية في السواقين😹😹😹

هل اعجبك الموضوع :

تعليقات